L : Marhite-hite goar ni Debata Ama, dohot goarni AnakNa Tuhan Jesus Kristus, dohot goar ni Tondi Parbadia na tumompa langit dohot tanoon, dipasaorma dameNa tu tondinta. Amen.

Rap ma hita mandok di tangiangta i 

L+J : Ale Jesus Tuhannami, bereng hami na dison, pinarmahanMi do hami saluhutna na dison, sai asi rohaM di hami, sai pangolu hami on. Amen.   

BE 18

UNGKAP BAHAL NA UMULI

1

Ungkap bahal na umuli, bagas ni Debatangki.

Ai tusi do au naeng muli, ganup jumpang Minggu i.

Hulului do disi, bohi ni Debatangki.

6

Pangkulingi au Tuhanku Asa hutangihon Ho

Patandahon tu rohangku Na tau pasangaphon Ho

Sai pabosur tondingki Dohot asiasiMi

L : Ida ma, suruanku ma suruanku, asa dipadiri dalan di jolongku. Dung i tompu ma ro tumopot jorona Tuhan, na niluluanmuna dohot suruan ni parpadanan na hinalungunhonmuna. Ida ma, na ro ma ibana, ninna Jahowa Zebaot.

Martangiang ma hita:

Ale Jahowa Debata, Amanami ro di salelenglelengna! Pujionnami ma Ho, ala ni balga ni holongMu naung pinapatarMu tu hami, marhitehite parsuruM di AnakMu Jesus Kristus gabe Sipangolu jala Sipalua hami sian dosa dohot hamatean. Na mangido ma hami tu Ho, sai urasi ma hami marhitehite TondiM na badia i, asa sintong panjangkonon nami di Jesus Kristus Tuhan nami. Sai rajai ma roha dohot pingkiran nami, asa marunduk ni roha hami manjangkon lbana, Raja naung ro i, sisombaon ni sandok jolma na di liat portibi on. Amen..

Didongani Tuhan Debata ma hita saluhutna, Haleluya.. Haleluya.. Haleluya..

L+H : Haleluya, Haleluya, Haleluya.

L : Tangihon ma Hata ni Debata nagabe singkat ni Patik di Minggu ta sadarion, ima na tarsurat di

Mateus 6:31-32

Songon on ma disok disi:

Antong unang ma holsoan rohamuna, mandok: Aha ma panganon nami? Aha ma inumonnami? Aha ma parabitonnami? Angka sipele begu do mangkaringkothon saluhutna sisongon i. Diboto Amamuna na di banua ginjang i do, naung ringkot angka i di hamu. 

*******

I do sahatna, Rap ma hita mangido gogo laho mangulahon hataNa i.

L+J : Ale Tuhan Debata sai pargogo i ma hami laho mangulahon na hombar tu hataMi. Amen!

BE 41

PARRIPE NI TUHANTA

1

Parripe ni Tuhanta sai hehe ma hamu

Sai jangkon ma Rajanta marroha na burju

Girgir ma hita be marende di Ibana

Manjouhon Hosianna burju ma sasude

2

Hamu na marsak roha jonok do Raja i

Na ro mangapul roha ni nasa na tungki

Torop nuaeng tahe inganan hasonangan,

I ma partangiangan Ni na porsea i

TANGIANG MANOPOTI DOSA DOHOT BARITA BAGA-BAGA

L : Martangiang ma hita manopoti dosanta tu Debata:

Ale Tuhan Debata, Amanami Pargogo na so hatudosan jala Parasiroha na sumurung! Huparhatopot hami ma di joloM, paboa pardosa na godang do hami sian hatutubu nami sahat ro di tingki on, marhite angka parange dohot parulan nami na so hombar tu lomo ni rohaM. Alai ianggo Ho, na badia jala na timbul situtu do GoarMu. Ndang tau hami nian ro jala jongjong di adopanMu, ala jolma na ramun do huhut na tangkang marroha. Jotjot do huramuni hami diri nami marhitehite roha, pingkiran nang hata nami, jala lupa do hami paboa naung diuras jala diparbadiai Ho marhitehite mudar ni AnakMu Tuhan Jesus Kristus Tuhan nami. On pe, ale Debata Jahowa, na mangido ma hami tu Ho, lehon ma TondiM tu hami, asa diparbadia roha ro di sandok ngolu nami, jala asa lam tangkas panandaon nami di asi ni rohaM, gabe margogo hami manirang diri nami sian angka ulaon haramunon dohot na humurang i. Sai urupi ma hami pabadiahon parsaoran nami dohot Ho di tongatonga ni huriaM, nang parsaoran dohot dongan nami jolma. Asi ma rohaM, sesa ma saluhut dosa dohot pangalaosion nami di HataM, ala ni AnakMu Tuhan Jesus Kristus, Sipangolu hami, Amen.

Tabege ma baga-baga ni Debata taringot ni hasesaan ni dosa:

Ai ndang olo Tuhan i mangambolongkon halak ro di salelenglelengna. Ai ia dung dipajimput manang ise, marpangulahi ma rohana hombar tu godang ni asi ni rohana. 

Hasangapon ma di Debata na di ginjang.

L+H : Amen!

BE 38

PARUAK MA HARBANGAN I

1

Paruak ma harbangan i, ai nunga ro Rajanta i

Sigomgom raja sasude, sitobus hajolmaon pe

Siboan hatuaon i, pasuang hasonangan i

I pe tapuji ma Tuhanta Debata

3

Martua luat, huta pe, dung jinangkonna Raja i

Rohanta pe sai sonang do, dung masuk Raja i naung ro

Ai tiur do rohanta i, dung ro panondang i tusi

Ipe tapuji ma Tuhanta Debata

L : Tajaha ma secara responsoria turpuk Epistel na tarsurat di

Jesaya 62:1-5

Songon ma di dok disi:

Ala ni Sion ndang tarbahen ahu sip, jala ala ni Jerusalem ndang olo ahu pompoman, paima binsar hatigoranna songon sondang ni mata ni ari, jala hatuaonna songon sulusulu na marsigorgor. 

J : Jadi idaon ni angka bangso parbegu ma hatigoranmu, jala saluhut angka raja hamuliaonmu, jala ingkon margoarhon goar na imbaru ho, sipaboaon ni pamangan ni Jahowa. 

L : Jadi gabe tumpal hamuliaon ma ho di tangan ni Jahowa, jala tumpal harajaon di tangan ni Debatam. 

J : Ndang be goaron ni halak ho: Na tinadingkon, jala ndang be dohononna tu tanom: Halongonan; ai goaronna ma ho: Hasoloan ni rohangku do ibana, jala tanomi: Naung marharajaan do ho! Ai lomo do roha ni Jahowa mida do, jala marharajaan tanomi. 

L : Ai songon ringkot ni dolidoli mangaririt namarbaju, songon i do ringkot ni angka anakmu mangalului ho; jala songon las ni roha ni pangoli mida na niolina, songon i do las ni roha ni Debatam mida ho. 

I do sahatna, tapaunduk ma rohatta, martangiang ma hita:

Martua ma halak na umbege dohot na umpeop hata ni Debata. Amen. 

BN 40

LAS BE MA ROHAMUNA

1

Las be ma rohamuna na tigor roha i

Naung ro do Rajamuna mamboan tua i

Ndang marpanggortap i anggo di haroroNa

Alai tuk do gogoNa padaohon jea i

5

Hamu na marsak roha di hasiangan on

Dibaen godang ni dosa na di portibi on

Sai hehe ma hamu padirgak ulumuna

Ai hamoraonmuna do Jesus i tutu.

BE 45

(Pelean 1 & 2)

HOSIANNA ANAK NI RAJA DAVID

1

Hosianna Anak ni, Raja David ro tu hita

Baen ture dalanNa i, asa bongot tu rohanta.

Baen ma gabagaba i, di Tuhanta na ro i.

2

Hosianna ro ma Ho, tu bagasan rohanami;

Na manomunomu Ho, ale Jesus Tuhannami.

Las do rohanami i, molo bongot Ho tusi.

3

Hosianna Raja ni hadameon Ulubalang

Nasa na binoanMi dame dohot hasonangan

Hami na hinophoMi do nampuna i sude

4

Hosianna Tatap ma hami na nirajaanMu

Togu ma tu Debata hami angka siseanMu

Sai sungguli hami on mangoloi hataM tongtong