(Sude Parhalado jongjong di altar pasahathon tabi)

L : Nunga jumpang muse ari Pesta i, i ma Pesta ari Hatutubu ni Tuhanta Jesus i. Saluhutna angka na porsea i marsurak-surak, marlas ni roha. Tubu Kristus i di huta ni si Daud, Betlehem. Saluhutna ma hami, Parhalado ni hurianta pasahathon Selamat Natal ma di hita.

J : Selamat Natal ma tutu

L : Antong, gomos ma hita marsijalangan, pasahathon dame na binoan ni Jesus Kristus i.

S : (Mangendehon BE 607:1 huhut masijalangan laos dison ma Parhalado mulak tu hundulan)

NUNGA TUBU KRISTUS I

1

Nunga tubu Kristus i Haleluya,

Di huta Betlehem i Haleluya.

Gabe daging Hata i Haleluya,

Di mula ni Natal i Haleluya

L : Marhite-hite goar ni Debata Ama, dohot goarni AnakNa Tuhan Jesus Kristus, dohot goar ni Tondi Parbadia na tumompa langit dohot tanoon, dipasaorma dameNa tu tondinta. Amen.

Rap ma hita mandok di tangiangta i 

L+J : Ale Jesus Tuhannami, bereng hami na dison, pinarmahanMi do hami saluhutna na dison, sai asi rohaM di hami, sai pangolu hami on. Amen.   

BE 57

NUNGA JUMPANG MUSE

1

Nunga jumpang muse ari Pesta i

Hatutubu ni Tuhanta Jesus i

Tuat do Ibana sian surgo i, mebat tu hita on

Hasangapon di Debata, dame, dame ma di jolma.

Las ni roha ni Debata hajolmaon muse.

3

Sombanami ma di Ho na tubu on

Ho siboan dame tu portibion

Sai pasaorhon ma tu rohanami on dameMi o Jesus.

Hasangapon di Debata, dame, dame ma di jolma.

Las ni roha ni Debata hajolmaon muse.

L : Alai gabe lam sumurung do asi ni roha ni Tuhanta i, mantat haporseaon dohot holong ni roha, di bagasan Kristus Jesus. Haposan jala sandok tau jaloon do hata on: Nunga ro Kristus Jesus tu portibion, paluahon angka pardosa: Hamuliaon dohot Hasangapon si salelenglelengna ma di Raja na so marmula i; i ma Debata na manongtong, na so dapot idaon, na mamunjung i! Amen.

Martangiang ma hita

Ale Tuhan Debata, Parholong ni roha mida hami jolma pardosa jala na sorat di hasiangan on. Pujipujian dohot hamauliateonma husombahon hami tu Ho, ala disuru Ho AnakMu Jesus Kristus ro tu tano on. Ditinggalhon do sangapNa, jala gabe jolma tumaon na porsuk, asa saor hami tu Ibana. Namangido ma hami tu Ho, lehonma TondiM maringanan di bagasan rohanami, asa dipatongtong haporseaon dohot pangkirimon namangolu di hami, jala boi huida hami balga ni panghokkopMu, gabe taruli hami jala martua di hatutubu ni AnakMu Jesus Kristus Tuhannami tu tano on, Amen.

Didongani Tuhan Debata ma hita on saluhutna, Amen. Haleluya, Haleluya, Haleluya!

S : (Mangendehon: Haleluya, Haleluya, Haleluya!)

L : Tangihon hamu ma Hata ni Debata na gabe singkat ni patik di Pesta Natal sadarion, i ma na tarsurat di

1 Petrus 2:5,

songon on ma hatana:

Sai olo ma nang hamu paulion, songon angka batu na mangolu, gabe bagas partondion jala hamalimon na badia, laho mamboan angka pelean partondion, halomoan ni roha ni Debata, marhitehite Jesus Kristus.

Disi ma sahatna. Antong rap ma hita mangido gogo!

S : Ale Tuhan Debata, sai pargogoi ma hami mangulahon na hombar tu hataMi, Amen.

BE 61

NA TAU LAS NI ROHA

1

Na tau las ni roha hatutubu ni

Jesus Sipalua haholonganki, Jesus Sipalua haholonganki

2

Tung godang do dosa pangunjunan pe

Mangarsahi hita paima mate be, mangarsahi hita paima mate be

TANGIANG MANOPOTI DOSA – HASESAAN NI DOSA

L : Martangiang ma hita manopoti dosanta!

Ale Jahowa, Parasiroha na sumurung. Na ro do hami nuaeng tu adopanMu manopoti saluhut angka dosa pangalaosionnami na huula hami ganup ari. Tung godang do angka ulaonnami na maralo tu rohaM. Jotjot do hulupahon hami marsomba tu Ho ala ni angka elaela ni portibion. Tung jotjot do holan pingkirannami sambing hupangasahon hami. Asi ma rohaM di hami. Marhite Pesta Natal sadarion, dipatuduhon Ho holong ni rohaM di hami pardosa, i ma holong na paluahon hami sian rante ni dosa. Asi ma rohaM di hami, tung unang paingot-ingot be dosa pangalaosionnami i. Amen.

S : (Mangendehon BE 54:3)

 SONANG NI BORNGINNA I 

Godang ni tua disi di na ro Jesus i

Tung malua pardosa muse, sian hamagoanna sude

Ala ro Sipangolu Jesus Tuhanta i.

L : On ma Hata ni Debata taringot tu hasesaan ni dosanta:

Ai songon on do holong ni roha ni Debata di portibi on, polado AnakNa nasasada i dilehon, asa unang mago ganup naporsea di Ibana, asa hangoluan nasalelenglelengna di ibana.

Hasangapon ma di Debata na di ginjang!

S : Amen.                                               

BE 46

NA SIAN GINJANG DO AU RO

10

O Jesus haholonganki bongoti dohot rohangki

Pabali sian i sude na tau mangago au muse

11

Haleluya, Haleluya na ro tu hita Debata

Martua hita baenon ni Saleleng ni leleng na i.

L : Tangihon hamu ma Hata ni Debata na gabe turpuk epistel di Pesta Natal sadarion, i ma na tarsurat di

Zakaria 9:9-10,

songon on ma didok disi:

Mariaia situtu ma ho, ale boru Sion, marolopolop ma ho ale boru Jerusalem! Ida ma, na ro ma rajam tumopot ho, partigor ibana jala siparmonang; na serep do rohana jala marsihundul di halode dohot di anak ni halode inaina. 

J : Jala ahu maniaphon angka hureta sian Epraim dohot angka hoda sian Jerusalem, siap dohot sior tu hamusuon. Dung i baritahononna ma hadameon tu angka bangso parbegu, jala masuk tu gomgomanna sian laut tu laut, jala sian batang aek Euprat sahat ro di angka ujung ni tano on.

L : I do sahatna! Martua ma angka na umbege jala na umpeop Hata ni Debata! 

S : Amen

 BE 56

SAI RO MA HAMUNA

1

Sai ro ma hamuna angka na porsea,

Sai ro ma hamuna tu Betlehem.

Ida dakdanak, Sipalua hita, tasomba ma Ibana

tasomba ma Ibana, tasomba ma Ibana, Rajanta.

4

O Jesus Tuhanku sai naeng pujionku

PambaenMu di ahu pardosa on

Ai gabe jolma Ho humophop ahu, tasomba ma Ibana,

tasomba ma Ibana, tasomba ma Ibana, Rajanta

U : Rap dohot angka dongan sahaporseaon di sap tano on, tahatindanghon ma haporseaonta i, rap ma hita mandok!

S : Ahu porsea di Debata Jahowa, i do Ama pargogo na so hatudosan, na tumompa langit dohot tano.

Ahu porsea di Jesus Kristus, Anak ni Debata Jahowa na sasada i, i ma na tinubuhon ni si Maria na gabegabean sian Tondi parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patoluhon, na manaek tu Surgo laho hundul tu siamun ni Debata Jahowa, AmaNa i, Pargogo na sohatudosan i, disi ma Ibana, paima mulak sogot tu tano on manguhumi halak na mangolu dohot na mate.

Ahu porsea di Tondi Parbadia, jala adong sada Huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i na mandok: Mulak mangolu sogot daging ni halak naung mate, dohot di hangoluan na so ra suda. Amen.

BE 62

(Papungu Pelean 1&2)

MARULAON NA BADIA KHUSUS

(RO MA TU JOLO 12 HALAK)

BE 153:1-2

1

O Jesus, naung sineat di hau na pinarsilang,

Roham tongtong daulat, nang uju Ho tarsilang.

Marutang hosa hami, ditaon Ho dosanami. Asi rohaM o Jesus.

2

Pelean na badia, na masuk tu Jahowa,

Singkat ni manisia, na so daulat roha.

Ditaon Ho dosanami, so i, lao mago hami, Asi rohaM, o Jesus!

BE 155:1-4

1

Tuson ma ho ale tondingku, di na mauas male ho,

Manjalo basa ni Tuhanmu, pinaradeNa i di ho.

Dilehon Jesus do dagingNa marhitehite roti on,

dilehon dohot do mudarNa marhitehite anggur on.

2

Ai nang tongtong pe ganup ari, mudarNa manguras i au,

Huhut Ibana so mansadi, manogu tu lambungNa au,

Sai naeng au mangan parpadanan ni Jesus Kristus, Tuhanki,

Na padamehon parbadaan, na pasonangkon rohangki.

3

Asi roham di au, o Jesus, tumpahi au sadarion;

Ai hataMi do hupatulus, manganhon parpadanan on.

Antong patiur ma rohangku, marningot denggan ni basaM

I ma na tinaonMu dosangku binaen ni holong ni rohaM. 

4

Patogu haporseaonku di hasasae ni dosangki,

Marsitiopan baen rohangku di mudarMi na durus i.

Sai ro ma ho, ale Tuhanku marhite parpadanan on.

JoroM ma baen nuaeng rohangku, Ho ma nampuna au tongtong.